2007/02/28

Iñaxio Arregi: Goiena Taldearen eragin asmoak TTDaren garaian



Sarrera

Goiena taldearen eragin asmoak TTDaren garaian
da nire hitzaldiaren izenburua. Gaur egungo egoera ezin da baina ulertu historia pittin bat egin gabe. Badirudi telebista digitala gauza berri bat dela; Aurrekaririk gabekoa. Baina, egia da berria izan arren, ez dela hutsetik abiatzen. Bai noski sekula telebistarik egin ez dutenentzat. Urteak telebista egiten daramatenentzat berriz, esan genezake arlo eta aukera berrien hedapena baino ez dela. Orain arte egiten ari ginena digitalean hedatu ahal izango dugu, eta interaktibitaterako jauzia emateko aukerak zabaltzen zaizkigu.

Interaktibitateak, etxeko telebistatik hainbat informazio eskuragarri edukitzea ahalbidetuko digu, eta baita ere, administrazio eta informazio-guneekin harreman zuzen bat edukitzea. Hori epe laburrera izango dugu gure etxeetan. Dagoeneko eros daitezke interaktibitate aukerak eskaintzen dituzten telebista eta mandoak. GOIENAn ere, hasiak gara dagoenekoz sasoi berrietarako gertatzen.

Goiena.net eta sakeleko telefonoen mundua izango dira telebistako interaktibitatera iristeko lehenengo urratuko ditugun bideak. Gaur egun gure albistegien laburpena ikus dezakezue internetez edo eta zuen laguna zoriondu bertara bere argazkia eta testu bat bidaliz.

Telefonotako aplikazioak lantzeko berriz, enpresa berri bat sortu dugu. Bluetooth –ak eskaintzen dituen abantailak aprobetxatuaz, hainbat aplikazio interaktibo prestatu ditugu dagoeneko hainbat bezero garrantzitsurentzat: Bilboko Udala eta Euskaltel besteak beste.

Zeuen buruari galde zeniezaioke zerikusi daukan gauza batek bestearekin. Zergatik nahasten dugun telebista intenetekin eta biak telefonoarekin. Oso sinplea da erantzuna. Hirurek oinarri digitala izango dute gutxi barru eta gaur egun posible ez diren aukerak zabalduko zaizkigu.

Hau irakur zitekeen otsailaren 25eko El País egunkariak.

Los fans de Héroes ya no tienen que esperar a que el canal temático Sci-Fi o las televisiones autonómicas lancen al aire la serie. Internet pone a su disposición los capítulos pocos minutos después de que se emitan en la estadounidense NBC. A veces, incluso se pueden descargar con subtítulos en español.

Eta deskargatutakoa, norberaren telebistan ikus ahal izango da laster. Edo telefonoan. Guztia ikus-entzunezko errealitate bakar bat izango da.

Aipatutakoak beraz, telebista digitalerako bidea egiteko gaur egun ditugun baliabide eta ikastoki garrantzitsuenak. Zuen baimenarekin ez dut gehiegi hitz egingo gai honetaz sekretu batzuk gordetzea ere komeni delako.

Alderdi teknologikoak aparte utziaz, badago beste aspektu bat kontuan hartu beharrekoa. Jarrera bat da. Gu txikiak gara eta gure txikitasunean ezer gutxi egin ahal izango dugu. Aspaldi ikasi genuen hori. Euskara elakerteen esparrua gainditu eta beste maila batera jauzia egitea erabaki genuenean: lankidetza.

Lankidetza izango da Goienak telebistarako eraiki nahi duen oinarri sendoa. Lankidetza, antzeko proiektuekin lanean arituko diren beste eragile publiko nahiz pribatuekin, gure ikusleei programazio hobe bat eskaini ahal izateko, interkatibitate aukeretan lehen lerroan egoteko, gure kostuak ondo lotuaz.

Barrura begira, multimedia ikuspegi sendo batez hornituta, ezin dugulako ahaztu hedabideen arteko integrazioa dela etorkizuneko antolakuntza eredua. Erredakzio bakar bat eta hiruzpalau euskarri. Hedabide desberdinetan lan egiteko gaitasuna izango duten profesionalak sortuaz

Hau duela bost urtetik hona ari gara lantzen. Arazo bat daukagu azken jauzia emateko. Egoitza zentral baten falta. Hainbat gestio egin ditugu baina oraindik ez dute emaitzarik eman.

Etorkizunaren zertzelada hauek eginda, hasi gaitezen gure historia laburra egiten.

Historia apur bat
Egungo euskarazko toki telebisten errealitatea ezin da ulertu AED eta Arrasate telebista kontuan hartzeke.

80. hamarkadaren erdialdean, gerora Euskal Herri osora hedatuko zen euskara elkarteen eredua sortu zen Arrasaten: AED (Arrasate Euskaldun Dezagun). Bere helburua Arrasate euskalduntzeko urratsak ematea zen. Hasieran lanik handiena kontzientziazio lana izan bazuen ere, gerora, funtzio berriak hartuaz joan zen. Euskarazko hedabideak sustatzea adibidez: Honen haritik, Arrasate Press herri aldizkaria sortu zuen 1988 urtean, eta 1990eko otsailaren 13an, asteartez, arratsaldeko 8etan hasi zen emititzen Arrasate Telebista.

Ordurako, Eskoriatzan, Telesko martxan zen. Telesko kable bidezko herri telebista bat da. Fundazio batek kudeatzen duena, Eskoriatzako udalaren laguntzarekin.

Eskualdearen barruan, beranduago, Aretxabaletak izan zuen bere telebista. Ez zuen asko iraun, sortu eta dozena erdi bat hilabetera GOIENA proiektua sortzeko xedearekin bat egin zuelako AED eta eskualdeko beste euskara elkarteekin. Horrela, 2000 urtean jarri zen martxan GOITB. Lehenengo, Aretxabalta eta Arrasaten, baina poliki-poliki eskualde osora hedatuaz joan dena.

Pareko fenomenoak beste eskualde batzuetan ere izan ziren. Oarso TB (1996), Oiartzun, Orereta eta Lezo udal barrutietan. Hau ere, indar handiz hasitakoa baina aurrekoarekin parekatuz poliki-poliki itzaliaz joan dena.

Beste batzuk aipatzearren, Zarauzko TB (1991), Mendaro TB (2002), Kaito TB (1986), Urdaibai (gaur Oizmendi, 2002an sortua), Xaloa TB eta Ttipi-ttapa TB ( biak 1997an) Nafarroan, Goierri TB (2003an) eta 28. kanala (2006an) Tolosalderako.

Honekin marraztuta geratzen da euskarazko tokiko telebisten sorrera. Tokikoak badaude gehiago. Tokikoak euskaraz ez. Beraz, esan behar dugu hiru epetan garatzen dela esparru hau: laurogeiko hamarkada eta laurogeita hamabost urtea bitartekoa; gutxi batzuk, kablez batzuetan, uhinez besteetan; 95etik 2006 artekoan indartu egiten da sektorea telebista berriak eta indartsuagoak sortuaz, eta 2007a ezkero konsolidatuko da legearen garapenarekin batera. Horrela espero dugu.

Hiru epe eta hiru data azpimarratu nahi izan ditut. Lehena, 1995 artekoa, legerik gabe eta dirulaguntzarik gabe garatu behar izan zena. Bigarren epean, 95etik 2006ra, legea badaukagu baina ez da garatzen. Legezko marko garbi bat gabe jarraitzen dugu espazioko piratak bezala. Tartean baina, badago albiste on bat, eta da, Jaurlaritza euskarazko tokiko telebisten ahalegina aintzakotzat hartzen hasi dela eta dirulaguntzak eskaintzen dituela. 200ta berriz, erabateko normalizazioari ekitekoa izango da gaur azaldu zaigun dekretuak ahalbidetuko digulako pirata izatetik legezko izatera jauzia eman ahal izatea.

Epea

Telebistak

Ezaugarriak

Oharrak

1985-1994

Telesko, Arrasate TB, Zarauzko TB, Kaito TB,

Arautegirik gabeko epea.


1995-2006

Oarso, Mendaro, GOITB, Xaloa, Ttipi-ttapa, GoierriTB,28 kanala

1995ko legea. Ez da garatzen 2002-2006 arte

2000 urtetik hona Eusko Jaurlaritza-ren laguntzak.

TOKIKOren sorrera

2007tik aurrera

Hamaika eta telebista berrien sorrera

Lizentziak lortzeko lehiaketa


Ikusten duzuenez nekeak handiak izan dira eta telebista hobe bat egiteko ahaleginak ere bai, bereziki 2004tik hona. Urte honetan lantzen da TOKIKO euskarazko tokiko telebisten elkartearen sorrera.

1. Goienaren sorrera
Aurretik badago beste hito garrantzitsu bat. 1999-2000an gogoeta kolektibo bat sortzen da Debagoieneko euskara elkarteen baitan. Komunikabideak eta euren etorkizuna aztertzeari ekiten diote. Euren esperientziatik abiatuta garbi ikusten dute herriko esparrua ez dela nahiko komunikabide indartsu eta bideragarri batzuk edukitzeko. Herritik eskualderako jauzia egiten dute eta 2000 urtean GOIENA sortzen da. Dagoeneko desagertu dira Atxabalta eta Arrasate TBk. GOITB da telebista berriaren izena.

Azkar ikusten dugu baina, telebista indartsuago eta osoago bat egin gura izanez gero, eskualdeko esparrua ere ez dela nahikoa. Beste errealitate batzuekin harremanetan jarri beharra dago tokikotasuna galdu gabe programazio komun bat egin ahal izateko. Topagunearen barruan ematen dira lehen saioak. Ttipi-ttapa, Oarso eta GOITB dira bilera hauetara agertzen direnak 2002. urtean. Ordurako Oarso nahiko ahul zen eta hiruzpalau bileren ondoren emaitzarik gabe amaitu zen saioa.

Hala ere ez genuen etsi, eta garbi ikusi genuen Topagunearen barruan ezin ba zen, kanpoan beharko lukeela baina lehenago edo beranduago gaiari heldu beharko geniola berriro. Lankidetzarik gabe ez dago etorkizunik euskarazko tokiko telebisten munduan.

Telebisten arteko lankidetzarako lehen urratsak
Ondorengo hau idatzi genuen 2003ko urriaren 8an Topaguneak antolatu zituen topaketa batzuetako ponentzia batean.

Goienatik urrats hauek proposatuko genituzke:

  • Euskarazko herri telebisten elkarte bat sortzea: Topagunearen barruan nahiz kanpo. Gaia presazko da. Gaur egun gehiago dira Topagunetik kanpo dauden herri telebistak barruan daudenak baino. Topagunetik berriak bultzatu beharko ditugu, baina bitartean lanean ari diren euskarazko telebistentzat irtenbideak aurkitu beharko ditugu.
  • Elkartearen helburu eta marka finkatzea: Helburuak lehenbailehen adostu beharko lirateke, kontuan izanik elkartearen helburuez gain, herri telebisten helburu orokorrak ere finkatu beharko liratekeela: euskarazko programazioa, eskualde osora hedatzea, euskara elkarteekin harremanak,... dira adostu beharreko puntu batzuk. Hauek guztiak eredu bat irudikatzen dute, eta marka eta imajina jakin batekin lotzen dira.
  • Ekoizpen gune bat abian jartzea: Gure tankerako herri telebisten programazio gehiena etxean egindakoa izaten da. Aukera gutxi ditugu kanpoan. Gure programazioak aberastu nahi baditugu ezinbestekoa da ekoizpen arazoei irtenbide bat ematea. Helburu garrantzitsuena herri telebistentzat programak egingo lituzkeen produktora bat sortzea litzateke.
  • Lankidetza eremuak aprobetxatzea:
  • Bitartean eta gero ere bai, euskarazko herri telebisten arteko programa trukaketak ahalbideratuko duen plangintza bat egin beharko litzateke, eta hasteko programa komun bat.
  • Programa trukaketez gain komertzial mailan eman daitezkeen sinergiak erabiltzen jakin beharko genuke
  • Eusko Jaurlaritza eta Aldundiekin laguntza hitzarmenak lortzea.
  • Ordezkaritza lanak. Elkarteak euskarazko herri telebisten kolektiboaren ordezkaritza izango luke Eusko Jaurlaritza, lurralde instituzio eta alderdien aurrean


2. Tokiko
Beno bada 2004. urtean gaude eta lan honi ekin diogu. Lehenengo, politika komertzial bat abian jarriaz. Sarrera komertzial gehigarri hauek amu ona dira sakabanatuta zeuden proiektu desberdinek ildo komun bat onartzeko.

Ondoren, hainbat bileretan, sektorearen diagnostiko bat eginaz premiazko beharrak adostu genituen. 2004 urtearen amaieran TOKIKO euskarazko Tokiko Telebisten elkarteko estatutuak aurkeztu genituen Elkarteen erroldak Donostian duen egoitzan.

Topagunea, Goierri, GOITB, Urdaibai (gaur Oizmendi),Ttipi-ttapa, Xaloa eta ZarauzkoTB izan ziren bazkide sortzaileak. Mendaro eta Oarsorentzat berandu zen, eta beste batzuk, Kaito esate baterako, nahiago izan zuten hasiera batean ez sartzea.

Geroztik beste bazkidetza berri bat ere izan dugu: 28 kanala, Tolosaldean emititzen duena.

Hauxe da gaur egun Tokiko. Ez da asko, baina onura handiak ekarri dizkio gure sektoreari. Gure lankidetza hainbat ekimenetan gauzatu da.

  • EITBrekin akordioa komertziala
  • Programak trukatzen hastea.
  • Sindikazio hitzarmena astean bakoitzak ordu erdi ekoizteko.
  • Astean ordubeteko produkzioa helburu 2007. urtean.

Planteamendu komertzialak, Jaurlaritzak igorritako zirriborroari egindako proposamen alternatiboak, aholkularitza legala,… dira elkarrekin urratu ditugun beste hainbat bide.

Hemen GOITBri ekarri dizkion onurak aipatuko ditut. Hasteko, programazioa jantzi eta aberastea lortu dugu. Badakigu eta konsziente gara oraindik ere badugula zer hobeturik, bereziki kalitatearen parametroetatik begiratzen badiogu. Kantitatearen ikuspegitik berriz, 2005tik hona ikaragarriko aldaketa izan du gure programazioak. Hau ikusle kopuruaren igoeran nabarmendu da, eta bereziki, larunbat eta igandeetako ikusleen kopuruan.

Ikus ondoko laukia:


2004

2005

2006

2003-06

Kostuen gehikuntza

%2,4

%2

%1,3

%5,8

Emisio orduen hazkundea

=

%43

%44

%106

Zehaztuaz:

  • 2003ko programazio parrilla, eguerdiz 13:30etik 16:30era eta iluntzean 19:30etik 23:30era zen. Egunero zazpi ordu.Larunbat eta igandeetan 13:30etik 16:15era. Hiru ordu eta 45 minutu eguneko.Guztira 42,5 ordu astean 2003. urtean.
  • 2006an egunero 13:15etik 00:15era. Zapatu eta domeketan; 8etatik 01:00 era. Guztira 89 ordu

Programazioa bikoiztu baino gehiago egin da, eta kostuak berriz, %5,8a igo dira

Emaitza numerikoak nabarmenak dira, eta honek bere eragina izan du ikusle kopuruan. 2004an hasi ginen CIESeko neurketekin. 2004ko ordea, ez zen urte osoko neurketa bat izan. Urtearen amaierakoa baizik. Urte horretako emaitzak ez dira oso sinesgarriak beraz. Hala ere, ondoko laukian ikus ditzakezue.

Debagoiena

2004

2005

2006

GOITB ikusle kopurua

%9,4 (ez da urte osoa)

%8,8 (urte osokoa)

%11,2 (urte osokoa)

%11,2ko portzentajea lortu genuen 2006an. Cuatro eta TVE2tik oso gertu.

Tele 5

Etb2

Antena 3

ETB1

TVE1

Quatro

Tve2

Plus

GOITB

%28,7

42,6

22,2

23,1

15,5

13,5

11,3

3,7

11,2

Gure iritziz oso emaitza interesgarriak, beste telebista guztien tropelean sartuta gaudelako bete betean. Atzetik, baina sikiera euren gurpilek egiten duten hotsa entzuten dugu. Susmoa dugu lehenago kontrola itxi ondoren iristen ginela.

Esan genezake guretzat oso baliotsua izan dela TOKIKOn egin dugun ibilbidea, eta hainbat ondorio ateratzeko balio izan digulako.

  • Lehena, ikusi ahal izan dugu posible dela euskarazko tokiko telebista bat garatzea, nahiz eta oraingoz dirulaguntza garrantzitsu batzuk behar izan. Ez da erraza telebista garestia delako, eta beste hedabide batzuekin parekatuz gero behar dituen azpiegiturak besteenak baino dezente garestiagoak direlako.
  • Ikusi dugu bidea elkarrekin egitea ezinbestekoa dela baldin eta etorkizunean bizirauteko aukerak izan nahi baditugu. Orain arte TOKIKOkoan elkarrekin, eta etorkizunean, zabaltzen zaizkigun aukera berriekin. Horretaz geroago hitz egingo dugu.
  • Ikasi dugu ere eskualdea dugula gutxieneko lan esparrua, eta herrikoa baztertu egin behar dugula.

2006ra iritsi gara eta fenomeno berri bat agertzen zaigu.

3. Hamaika TB
Gu, Goiena, neu pertsonalki eta Tokiko-ko lagunak, aspaldian hasita geunden etorkizuneko proiektu indartsu bat sortzeko asmotan. 2004ko abuztuan hain zuzen, lehen harremanak izan genituen beste instituzio batzuekin hiriburuetan euskarazko tokiko telebistak martxan jartzeko asmotan.

Hainbat kezka genituen, labur-labur aipatuko ditudanak, atzera begira egoteak ez duelako etorkizuna lantzen laguntzen.

Lizentzien banaketarako epeak zabaltzear zeudela, kezka handiz ari ginen ikusten ez zegoela ekimen berririk euskarazko tokiko telebista berriak sortzeko. Ezinbestekotzat jotzen genuen Hego Euskal herriko lau hiriburuetan euskarazko telebista bana sortzea.

  • Biztanle gehien eta euskaldun gehien hor biltzen zelako.
  • Inor aurkeztu ezean esleitzeko ziren kate guztiak Madrileko enpresen esku geratzeko arriskua zegoelako.
  • Tokiko euskarazko telebisten sare bat bultzatzeko ezinbestekoa zelako hiriburuetan egotea lehen aipatu arrazoiengatik eta arrazoi komertzialengatik

Lehenengo bilera Partaideko ikastoletako ordezkariekin izan zen 2004ko abuztuaren 4an. Euskaltelekin ere izanda genituen harreman batzuk eta begi onez ikusten zuten ekimena. Kezketan bat eginik Topagunearekin bildu ginen ondoren eta bi elkarte hauek (Topagunea eta Partaide) hartu zuten bidea egiteko konpromisoa.

Alderdi politiko eta beste hainbat eragile sozialekin bildu ginen gure asmoak azaltzeko. Guztiok bat gentozen diagnostikoan eta zerbait egin beharrean.

Aurrerago beste ekimen batzuen berri izan genuen. Guztiekin jarri ginen harremanetan proiektu bateratua bultzatzeko. HAMAIKA sortu zen eta haatik edo besteagatik proiektu honetatik kanpo geratu dira, bai GOIENA, baita ere beste Tokiko telebistak, eta hasiera batean lanean ari ginen beste elkarteak: TOKIKO, Topagunea, Partaide,...

Guretzat tristea izan da baina ez traumatikoa. Traumatikoa izango da etorkizunari buruz egin beharreko gogoetaren ondorioz ez badugu lortzen euskarazko tokiko telebisten esparru indartsu bat. Uste dugu guztion erantzukizuna dela. Ari gara, nekez, eta esan behar dugu orain arteko harremanek ez dutela eman, gaurko egunez, nahi genuen emaitzarik

4. Euskara eta euskarazko hedabideak
Lehenago ikusi ahal izan duguGOITBk eta beste telebistek Debagoienean dituzten ikusle portzentajeak.Hemen,hurrengo laukian euskarazko telebistek Debagoienean lortu duen ikusle kopurua ikusi ahal izango dugu.

Ikusle kopurua

Debagoiena

2004

2005

2006

GOITB ikusle kopurua

%9,4 (ez da urte osokoa)

%8,8 (urte osokoa)

%11,2 (urte osokoa)

ETB ikusle kopurua

%23,4

%26,7

%23,1

GUZTIRA

%32,8

%35,5

%34,3

Ikus dezakezue gure eskualdean hiru lagunetik batek ikustenduela telebista euskaraz. Hau ez da orokorrean ematen den fenomeno bat.

Eustatetik CIESeko datuetatik atera ditut hurrengo zenbakiak.


Araba

Bizkaia

Gipuzkoa

E.A.E.

Euskaldunak

%16

%24,96

%51,5

%32,43

Ia euskaldunak

%25

%24,8

%19,7

%23,12

Erdaldunak

%59

%51,04

%28,8

%44,45

Euskarazko prentsa ordainduko irakurleak

%2,6

%3,3

%7,6


Euskarazko telebisten ikusleak

%4,6

%3,9

%14,1


Irratiko entzuleak

%4,3

%5,9

%28,4


Gurean euskarazko telebisten ikusle portzentajeak euskaldunenetik dezente beherago daudela ikusi dugu lehenago. Pentsa zer gertatzen den beste eskualde batzuetan.

Komunikabideetako kontsumo ohiturak goiko laukikoak direla diote estatistikek. Euskaldunok erdarazko komunikabideak kontsumitzeko hautua egiten dugu orokorrean. Norberak jakingo du zergatik. Norberak bere arrazoiak izango ditu eta seguru oso pisutsuak.

Gure seme-alabentzat eskola eredua aukeratzeko orduan berriz, oso desberdinak dira gure irizpideak. Ikus bestela Eustatek dioena


Araban

Bizkaian

Gipuzkoan


D eredua H.H.n

%39,9

%59,3

%79,2


B

%48,3

%30,7

%18,4


A

%11,8

%10

%2,4


Zergatik gertatzen da hau? Mila arrazoi eman ahal izango dira. Errudunak ere hautatuak izango ditugu. Baina errealitatea oso gordina da. Eta seguru komunikabideetan ari garenok badugula errurik. Gogoeta egin beharko dugu, baina aukerak baliatu ere bai.

5. Tokiko telebisten arteko lankidetza
Gaur egun sekula izan dugun aukerarik onenaren aurrean gaude TTDaren esparru arautu berri honen aurrean. Aurreko zenbakiek adierazten dituzten ohiturak aldatzen saiatzeko ezinbestekoa da elkarren arteko lankidetza. Protagonismoak albora utzi eta elkarlanari ekiteko sasoia iritsia da.

Eragile berriak dauzkagu. Hamaikaren sorrerak ilusioa piztu du sektore euskaldunetan eta hainbat eragile eta proposamen berri sortu dira. Hor daukagu Ibaizabalen eredua Bilbon. Gainera, paperean ari ziren hainbat enpresek telebisten arlora egin dute jauzia proiektu honen bidez.

Esperientzia daukagu. Lehen ikusi dugu hainbat tokiko telebiusta duela hamabost urte lanean hasita daudela. Honek esan nahi du gutxieneko sare bat daukagula: profesionalak eta azpiegiturak. Skoz gehiago beharko ditugu, baina ez gara zerotik abiatzen.

Lankidetza jarrerak. Landu ditugu Tokikon lanean aritu garen bi urteotan. Gaur egun ohikoa da gure ekoizpena beste eskualde batzuetan ere ematea, eta ikuskera hori ere barneratuta daukate gure profesionalek. Bidearen zati bat eginda daukagu.

Nik uste goiko puntu guztiak lotzeko gaitasunik baldin badaukagu erreferente on bat eraikitzeko aukera izango dugula. Ezinbestekoa izango da eragile berrien indarra zaharrenen esperientziarekin uztartzea lankidetza jarrera sendoak erabiliaz. Horrela bakarrik lortuko dugu hurrengo hamar urtetarako sektore indartsu, orekatu eta egonkor bat. Hamar urte barru gerta daitekeenaz orduan egingo dugu gogoeta. Bitartean lanariekin beste irtenbiderik ez daukagu.

6. Lizentzien esleipena
Gaur egun sektorea une erabakior baten aurrean dago. Ez bakarrik sektorea. Bertako komunikabideen esparrua eta euskara bera ere bai.

Gaur egun, gure irratietako dialak Españako emisoraz beteta daude. Radio Nacional, COPE, Cadena SER,… guztiak Madrileko emisorak. Euren jarduera erdara hutsean egiten dute noski

Prentsari begiratzen badiogu, Vocento dugu indartsuena E.A.E.n.

Gauza bera gertatzen da telebisten munduan. Tokikoei begiratzen badiegu estatuko hiru talde daude dagoeneko Euskal Autonomia Erkidegoko hiriburuetan. Oker ez banago ondokoa da banaketa:

Katea - Hiria

Bilbo

Donostia

Gasteiz

Vocento – punto

Bilbovisión

Teledonosti

Alava 7

Localia

Canal Bizkaia

Localia TV

Canal Gasteiz

Local media

TeleBilbao

Tele Donostia

Tele Vitoria

Hauetaz aparte, lizentzien esleipenera beste hainbat aurkeztuko ote diren zurrumurruak daude: Kiss TV, Canal 7 TV, Onda Cero, COPE,…

Hau da datorkiguna baldin eta ez bagara gai elkarren ondoan urratsak ematen hasteko.

Gaur aukera bat daukagu eta ezin dugu pasatzen utzi. Horregatik protagonismoak albora utzita, GOIENAtik, nahiago dugu beste eragileekin bat egitea eta elkarlana bultzatzea.

Hamaika eta Tokikoko telebisten arteko lankidetza.
Horregatik egiten dugu apustu garbi bat Hamaika eta TOKIKOko telebisten arteko lankidetza akordio baten alde.

Zer eskaintzen dugu GOITB eta TOKIKOko telebistek? Hasteko, jardunena ari diren zazpi telebista. Gainera, hauetako bi Nafarroakoak izanik, Erkidego Autonomoko esparrua gainditzeko aukera. Zazpi telebista dagoenekoz lanean, buruhauste gutxiago eragile berrientzat. Lasaitasun honek beste proiektu batzuk bultzatu eta indartzeko eukera emango die eragile berriei. Hamar urteko epea, lizentziaren iraupena, hurrengo deialdia plazaratu arte, eta hamar urte gogoeta estrategikoa berrikusi eta proiektu berriak lantzeko.

Zer ematen du Hamaikak? Sare sendo bat osatzeko behar besteko indarra. Hiriburuetan egoteak bultzada garrantzitsua ematen dio proiektuari eta zazpi izan ordez, hamabost edo hamazazpi izateak, erosketa ahalmen handiago bat ematen digu. Horrela, beste telebista batzuk sortzeko erantzukizuna eta kargak ez dira jada gureak. Tokikon gaudenonak alegia. Hamaikaren bidez gainera publizitate gehiago lortzeko bidea daukagu. Programazioa eta publizitatea.

Elkarrekin joateko proposamena egin diogu elkarri. Harremanak luzeak eta zailak ari dira izaten. Behin baino gehiagotan izan gara hitzarmena izenpetzetik gertu baina oraindik eztabaidan jarraitzen dugu. Guk ez dugu esperantzarik galdu, guztiok irabazle gertatuko ginatekeelako: telebistak, Hamaika, eta ikuslea. Uste dugu hitzarmen bat lortuko dugula.

Etorkizuneko bidea ordea, ez da hitzarmena lortzea baino errazagoa izango

  • Lizentziak lortu beharko ditugu beste batzuekin lehian. Beharbada gure eskualdean ez da lehiakide askorik izango baina beste batzuetan seguru baietz. Pentsa genezake euskara hutsean emititzeak abantaila handia ematen digula, baina zer gertatuko da beste operadoreek etxeko lanak ondo egiten badituzte?
  • Lege berriaren eskakizunetara egokitu beharko gara. Emisio ordu orijinalak prestatu sare kontzeptuak barneratuz.
  • Digitalizazioa barneratu, azpiegiturak eta prestakuntza landuaz. Pertsonala prestatuaz.
  • Interaktibitateak eskainiko dizkigun aukeretarako prestatu beharko gara. Gaur egun konprobatuta dugu aurretik joatea dela arrakastaren giltza. Euskarazko blogen munduak ere hori erakutsi digu. Gauza bera gertatuko da hainbat aplikazio plazaratzeko orduan.


Horiek guztiak, derrigor eman beharreko urratsak izango dira eta denbora bat beharko dugu duda barik.

Goiena Taldearen eragin asmoak TTDaren garaian
Bitartean eta amaituaz joateko gaurko hitzaldiaren izenburura noa berriro: GOIENA taldearen eragin asmoak TTDaren garaian. Uste dut nahiko garbi azaldu direla ponentzian zehar baina laburtu egingo ditut.

  1. Lizentzia lortzea, eta horretarako lizentzia lortzeko etxekolanak ondo egitea. Hau ezinbesteko baldintza dugu. Ondoren etorriko dira beste guztiak.
  2. TTDa gure eskualde osora zabaltzea. 439/2004 Errege dekretuaren arabera, hainbat herri barrutitik kanpo geratzen dira: Aramaio, Elgeta, Antzuola eta Leintz-Gatzaga. Herri txikiak laurak. Ez dakigu zergatik ez diren sartu, arrazoiak teknikoak izan ote diren ala bestelakoak. GOIENAk, eskualdeko komunikazio beharrak asetzeko sortua izan denez, ahaleginak egingo ditugu herri hauek ere barrutian egon daitezen
  3. TTDaren interaktibitateko aukerak aztertzea, beharrak identifikatuz eta soluzio egokiak aurkituz GOIENArentzat eta eskualdeko udal eta eragileentzat.
  4. Euskara eta euskaldunen esparru komunikatiboa indartzen jarraitu, biztanleek geroz errazago eta gehiago kontsumi dezaten euskarazko komunikabideak
  5. Multimedia ikuspegia indartu, ikusentzunezko arlo handi bat sortuaz. Telebista-internet-irratia. Denborarekin ikusi beharko genuke nola txertatzen dugun prentsa atal honen barruan.
  6. Lankidetza bultzatzea, beste barruti batzuetan antzeko beste proiektu batzuk indartzen laguntzeko.

Hau guztia 2009 urtea bitarteko epealdirako egitamua izango da. Hortik aurrerakoa, sortuko den egoera berria aztertuaz landu beharko dugu.

Edurne Basoa: Tokiko telebista digitala Euskadin



Hauxe da Edurne Basoa Kultura Saileko Kabinetearen eta Gizarte Hedabideen zuzendariak bere hitzaldian --
Tokiko Telebista Digitala Euskadin. Arautzeko dekretua. Eredu eta helburuen luze-zabalak-- esandakoa:

Egunon guztiei eta eskerrik asko Mondragon Unibertsitateko Humanitate eta Hezkuntza Zientzien Fakultateari jardunaldi honetan parte hartzeko aukera eman digulako.

Egindako lan banaketa errespetatuz, niri dagokit tokiko telebista digitala arautzeko irizpideak azaltzea, hau da arautzeko Dekretua eta lehiaketarako baldintzak.

Dakizuenez, tokiko uhinen bidezko telebista digitalaren zerbitzuaren prestazioak zerbitzu publikoaren izaera du. Zerbitzua gauzatzeko administrazioaren kontzesioa beharrezkoa da eta kontzesioak lehiaketa publiko baten bidez banatuko dira.

Bai tokiko telebista digitala arautzeko Dekretua, baita lehiaketarako Administrazio Klausula Zehatzen eta Preskripzio Teknikoen agiriak ere indarrean daude. Eusko Jaurlaritzako Gobernu Batzordeak 2006ko urriaren 3ko bere ohiko bileran Dekretua onartu zuen eta azaroaren 28ko bileran bi Agindu onartu zituen:

  • Tokiko telebista digitaleko kanalak udalerriei esleitzeko prozedura eta araubidea ezartzen duen Agindua, alde batetik, eta
  • Tokiko telebista digitaleko kanalak zeharkako kudeaketa-erregimenean esleitzeko lehiaketarako deia egiten duen Agindua, bestalde.

Eskaintzak aurkezteko epea martxoaren 23an amaitzen da, bai udalentzat, baita partikularrentzat ere.

Gaurko hitzaldi honetan garatuko ditudan arloak honako hauek dira:

  1. Oinarrizko Legedia
  2. Barrutiak
  3. Kudeaketa ereduak
  4. Helburu nagusiak
  5. Emakidak esleitzeko prozedura
  6. Zenbait ezaugarri
  7. Epeak

1.- Oinarrizko legedia

  • Autonomia Estatutuaren 19. atala.
  • 41/1995 Legea, abenduaren 22koa, lurreko uhinen bidezko tokiko telebistari buruzkoa.
  • 32/2003 legea, azaroaren 3koa, telekomunikazioei buruzkoa.
  • 10/2005 Legea, ekainaren 14koa, lurreko uhinen bidezko telebista digitala bultzatzeko, kable bidezko telebista liberalizatzeko eta aniztasuna sustatzeko premiazko neurriak zehazten dituena.
  • 439/2004 Errege Dekretua, martxoaren 12koa, tokiko telebista digitalaren plan tekniko nazionalari buruzkoa
  • 10/1982 Legea, azaroaren 24ko, euskararen erabilera normalizatzeari buruzkoa.
  • 3/2005 Legea, otsailaren 18koa, haurrak eta nerabeak zaintzeko eta babesteko.
  • 4/2005 Legea, otsailaren 18koa, emakumeen eta gizonen berdintasunerakoa.
  • Gainontzeko araubidea. (publizitatearen inguruko arauak, administrazioen kontratu legea, … )

2.- Barrutiak
Araubideaz gain, tokiko telebistaren planifikazioa eta mapa osatzeko beharrezkoak ditugu, baita ere barrutiak. Tokiko Telebista Digitalaren Plan Teknikoaren bidez zehaztu zituen barrutiak Estatuko Administrazioak, Autonomi Erkidegoen eskaerak entzun ondoren.

Ondorengo zerrendan, herri batzuen izenak azpimarratuta ageri dira. Udal horiek tokiko telebistaren kanal baten erreserba egin zuten bere garaian, duela bi urte. Orain, orduan egindako erreserbaren eskabidea gauzatu behar dute. Legez, barruti bakoitzean, telebista kanal bat udalen esku gera daiteke, horretarako eskabidea balego eta salbuespen gisa bi. Oraingo honetan, bere garaian egindako erreserbaren eskabidea egiten ez badute, kanal horiek lehiaketaren bidez banatuko lirateke.

ARABA, 2:

    • Vitoria-Gasteiz: Vitoria-Gasteiz
    • Laudio: Laudio, Amurrio

BIZKAIA 6:

    • Bilbao: Bilbao, Basauri, Galdakao, Arrigorriaga, Etxebarri
    • Getxo: Getxo, Leioa, Erandio, Sopela, Berango, Plentzia, Urduliz, Barrika, Lemoiz
    • Durango: Durango, Abadiño, Elorrio, Amorebieta-Etxano, Berriz
    • Bermeo: Bermeo, Lekeitio, Markina-Xemein, Gernika, Ondarroa
    • Mungia: Mungia, Derio, Sondika, Zamudio, Lezama, Loiu, Bakio, Larrabetzu, Gatika, Gamiz-Fika, Maruri- Jatabe, Meñaka, Arrieta, Fruiz
    • Barakaldo: Barakaldo, Portugalete, Sestao, Muskiz, Ortuella, Trapaga, Abanto-Zierbana, Santurtzi

GIPUZKOA 7:

    • Irun: Irun, Errenteria, Pasaia, Hondarribia, Oiartzun, Lezo
    • Donostia: Donostia, Hernani, Lasarte-Oria, Andoain, Urnieta, Usurbil, Astigarraga
    • Tolosa: Tolosa, Villabona, Anoeta, Itsasondo
    • Beasain: Beasain, Zumarraga, Urretxu, Ordizia, Legazpi, Ataun, Ormaiztegi
    • Zarautz: Zarautz, Orio, Azkoitia, Azpeitia, Zumaia
    • Arrasate: Arrasate, Bergara, Oñati, Aretxabaleta, Eskoriatza
    • Eibar: Eibar, Ermua, Elgoibar, Soraluze

Guztira 15 multiplex digital ditugu. Horietako bakoitzak 4 telebista kanal digitalerako aukera ematen du gaurko teknologiaren arabera, beraz, guztira, Euskal Autonomia Erkidegoan 60 telebista kanal digital izateko aukera dugu.

3.- Kudeaketa ereduak
Zerbitzuaren Udal-Kudeaketa edo zuzeneko kudeaketa, Toki Araubidearen Oinarriak arautzen dituen Legeak aurreikusitako kudeaketa ereduei jarraituz:

  • Udal zerbitzu baten bidez
  • Tokiko elkarte autonomo baten bidez
  • Udal elkarte publiko baten bidez (kapitala %100ean publikoa behar du izan)
  • Tokiko merkataritza elkarte baten bidez ( kapitala %100ean udalarena eta udalen elkarte batena beharko du izan)

Udal zerbitzuaren eskabideak ez dira lehiaketaren bidez emango, berezko bidea jarraituko dute.

Partikularrek kudeatutako zerbitzua.

    • Lehiaketaren bidez banatuko da, lehiaketan horretarako jarritako baldintzak beteaz.
    • Eskatzaileak pertsona fisikoak direnean, honelako telebista zerbitzuen zeharkako kudeaketa barne hartu beharko du soziedadearen edo baltzuaren helburuak.
    • Elkarteen kasuan, akzioak izendunak izango dira eta Telebista Pribatuari buruzko 1988ko Legean ezarritako partaidetzako mugak beteko dira.

Irabazi-asmorik gabeko erakundeen bidezko kudeaketa, Udalaren konpromisoarekin, beti ere barruti horretan zuzeneko kudeaketako telebistarik ez balego.

Erakunde hauek, barrutiaren zeharkako kudeaketaren kontzesio bat lortzeko lehentasuna izango dute, lehiaketan dagokion eskabidea aurkeztuz.

Erakundeok horrelako ezaugarriak izango dituzte:

    • Irabazi-asmorik gabekoak izan
    • Zerbitzu eremuarekin lotura zuzena izan
    • Barruti barruan dauden udalerriaren inguruko edukiak dohainik hedatzeko aukera eskaintzeko konpromisoa. Eduki horiek ikus-entzule gehien egoten diren orduetan emango dira eta gutxienez egunean ordubete iraungo dute.

Gerta liteke barruti jakin batean, bat baino gehiago izatea telebista kanal bat lortzeko eskaintza aurkezten duten irabazi-asmorik gabeko elkarteak. Hau horrela balitz, lehiaketarako eratuko den kontratazio mahaiak aukera izango du beraien arteko akordioa bultzatzeko eskaintza bakar bat egon dadin barruti jakin horretarako, telebista-kanala denek elkarrekin kudeatu dezaten. Akordiorik ezean, esleitzeko prozedurarekin jarraituko da.

4.- Helburu nagusiak

  • Gertutasuna
  • Eduki propioak
  • Euskararen presentzia

Horiek izan dira Kultura Sailak hizpide izan dituen helburuak tokiko telebista digitalaren zerbitzua arautzerakoan, horiek direlako, azken batean, tokiko telebistaren ezaugarririk nabarmenenak.

Gainera, tokiko telebista digitala, zerbitzu publikoko izaera izanik, beste printzipio batzuk ere islatu behar ditu bere programazioan: informazio-aniztasuna, objetibotasuna, berdintasunaren aldeko balioak sustatu, gizalegezko eta lankidetzazko balioak helarazi eta beste batzuk.

4.1.- Gertutasuna

    • Tokiko telebistek hurbileko esparruari lotutako informazioa eskaini behar dute. Gaur egungo gizartean tokikotasunak funtsezko lekua du eta hor dute tokiko telebistek gunerik behinena
    • Bestalde, hiru urte barru izango dugun telebista mapa digital berrian, estatu mailako telebistek izugarrizko pisua izango dute. Gaur egun aurreikusita dagoen planifikazioaren arabera, 2010. urtean estatu mailako 32 telebista kanal berri sartuko zaizkigu etxean. Horretaz gain, Euskadik, dagoeneko, autonomi erkidego mailako multiplex digital bat -4 telebista kanal- du planifikatuta eta itzalaldi analogikoa gertatzen denerako, beste multiplex bat izango du. Digitalizazioak goitik behera aldatuko du gaur egungo panorama eta inguru horretan, hurbiltasunak izugarrizko garrantzia izango du.
    • Kanpotik datorkigun eskaintzaren aurrean orekari eutsi behar diote tokiko telebistek, lehian aritu gabe. Tokiko telebistek beraien esparru propioa dute eta horri eskaini behar diote ahalegin guztiak, hau da, tokiko komunikazio esparru propioa eraikitzeari.
    • Gure ustez, tokiko komunikazioa indartzera eta tokiko sarea eraikitze aldera lan egin behar dute tokiko telebistek .

4.2.- Eduki propioak

    • Legez, tokiko telebistek ezin dute telebista-katean emititu edo horietako batean parte hartu. Katean emititzea: asteko programazioaren %25etik gora programazio bera.
    • Egunero 4 orduz eta astean 32 orduz jatorrizko programazioa emititu behar dute eta programazio horren erdia, operadoreak berak ekoiztutakoa behar du izan, euskarazko portzentajeak beteaz.
    • Etorkizuneko telebistek zerbitzu eremuari zuzendutako programazioa emititu beharko dute egunero, gutxienez, ordu erdi bat. Programazio hau ezingo da sindikazioaren bidez ekoiztu.
    • Jatorrizko edukiok, euskarazko edukiak bezala, ikus-entzule gehiengo orduetan emango dira.
    • Era berean, euskal musika eta ikus-entzunezko produkzioak izango direla bermatuko da. Horretarako, euskal autore eta abeslarien lanek eta emanaldiek, emisio-denbora osoaren %15 hartuko dute
    • Zama izan daitekeen betekizuna errazteko (jatorrizko edukiak) sindikazioaren bidea proposatu da. Euskal kulturaren esparruko tokiko telebista bik edo gehiagok elkarlanean eta esklusiboki ekoitz ditzaketena eta, gainera, beraiek zuzenean edo eurentzako hirugarren batek gauza ditzaketen jatorrizko produkzioen emisioa hartuko da sindikazio bidezko emisiotzat.
    • Beraz, sindikazioan ekoiztutako programazioa, jatorrizko programazioa izango da eta ez da “katean egindako programazio bezala” kontuan hartuko .
    • Katean edo sindikazioan egindako emisioak, ezin izango dira barruti batean aldi berean eskaini.
    • Programazio orokorraren %40a sindikazioaren formularen bidez egin daiteke eta portzentaje hori %60ra zabalduko da udalentzat, irabazi-asmorik gabeko kudeaketa duten tokiko telebistentzat eta euskararen eskaintza minimotatik gora egiten dutenentzat.

· Edukiekin lotuta, labur bada ere, zerbitzuen datu osagarriak aipatu nahi nituzke. Multiplex digital bakoitzaren transmisio ahalmenaren %20 zerbitzu osagarriak transmititzeko erabili ahal izango da. Zerbitzuen datu osagarri hauek emango digute, neurri handi batean, gaur egun telebistarekin dugun harremana aldatzeko aukera. Telebistaren bidez ez ditugu irudiak besterik hartuko, telebista tresneri baliagarria izango da zenbait zerbitzu eta informazio jasotzeko. Zerbitzu hauetan, teknologia digitala erabiltzen duten era guztietako zerbitzuak egon daitezke.

4.3.- Euskararen presentzia / Hizkuntzaren irizpideak

· Tokiko telebistek izugarrizko garrantzia dute tokiko komunikazioaren esparrua eraikitzerakoan, gure hizkuntza, gure kultura eta gure-gureak diren ezaugarriak oinarritzat hartuta.

· Proposatu ditugun hizkuntza irizpideen bidez, euskara komunikazio hizkuntza izatea lortu nahi da.

· Euskara lehentasunezko hizkuntza izango da tokiko telebista guzti-guztietan bai publikoetan baita pribatuetan ere. Ez da gaztelania hutsezko tokiko telebistarik izango. Orokorrean, eredu elebidun baten aldeko apustua egin dugu, baina bultzatu egingo dira euskara hutsezko emisioak edo gutxieneko batzuetatik goragoko euskararen eskaintza egiten duten eskabideak.

· Lortu nahi duguna da orain ez bezala, etorkizunera begira euskarak ateak zabalik izatea tokiko telebistetan. Gaur egungo egoera aldatu nahi

· Proposatutako hizkuntza ereduak, barruti bakoitzaren egoera sozioliguistikoa du gogoan, bertako elebidunen portzentajea kontuan izanik.

· Gutxieneko orokor batzuetatik abiatuta, barruti bakoitzeko indize soziolinguistikoaren araberako kuota sistema ezarri da, hiritarrek euskaraz zein gaztelaniaz informazioa jasotzeko eskubidea bermatuta izan dezaten.

· Euskarazko emisioei erreparatuz, euskara hutsean ematen ez diren kanaletan, bai zuzeneko kudeaketakoetan zein zeharkakoetan, goizeko 7:00etatik gauerdira arteko ordu-tartean eskainiko dira euskarazko emisioak, proportzionalki banatuta.

· Dena den, ikus-entzule gehien dagoen orduetan, barruti horri dagokion indize soziolinguistikoa hartu beharko du, gutxienez, euskarazko programazioak. Udalen kasuan, gutxieneko bataz bestekoa eta indizea %50ekoa izango da.

· Euskarak toki duina izango du toki telebista guztietan, publikoetan eta pribatuetan.

· Gutxieneko horietatik gora, euskara hutsezko emisioak egiteraino aukera dago eta horiexek lehenetsiko dira, bete beharreko bideragarritasun baldintza teknikoak eta ekonomikoak betetzen badira.

· Udalei, partikularrei baino betebehar altuagoa ezarri zaie, Erakunde Publikoei politika publikoen eredua izatea dagokigulako.

Hizkuntza irizpideak zehaztuz, udalek zuzenean kudeatutako telebista-kanalek

  • Euskarazko gutxieneko programazioa, emisioen erdia izango da.
  • Barrutiaren elebidunen indizea %50a baino handiagoa denean, portzentaje hori izango da euskararen emisioen gutxienekoa.
  • Gutxieneko horretatik euskara hutsean egiteraino, udalen esku dago.
  • Elebidunen indizea %25etik beherakoa duten eremuetan, kontzesioaren hasierako epealdian euskararen %25a bermatu beharko dute eta handik 7 urtera, nahitaezko %50a lortu beharko dute.
  • Barrutiaren elebidunen indizea %25ekoa edo hortik gorakoa denean, emisioen hasieran euskarak emisio-denboraren %50a hartuko du eta barruti horri dagokion euskara indizea hasi eta 7 urtera.

Partikularren esku geratzen diren tokiko telebistek:

  • Edozein izanik barrutiari dagokion indize soziolinguistikoa, programazio-denboraren %20 gutxienez, euskaraz eman beharko dute. Beraz, %20 da gutxieneko indizea.
  • %20tik gorako elebidun portzentajea duten zonaldeetan, portzentaje horri lotutako euskarazko programazioa egingo da.
  • Gutxieneko hauetatik abiatuta, euskara hutsezko telebista egitea, eskatzaileen esku geratzen da.
  • Eremuaren elebidunen portzentajea %25etik behera denean, hasieran %20ko euskararen presentzia ziurtatuko da eta hasieratik 5 urtera eremuari dagokion portzentajea.
  • Bestalde, eremuaren elebidunen indizea %25etik gora denean, emisioen hasieran indize horren %70eko euskarazko emisioak egingo dira eta barrutiari dagokion portzentajea 7 urtetan bete beharko dute.

Benetan uste dugu hizkuntza irizpide hauekin bermatu egiten dela euskaraz zein gazteleraz informazioa eskuratzeko hiritarrek duten eskubidea eta bestalde, argi geratzen da, baita ere, tokiko telebistek euskaren sustapenean duten ardura. Gutxieneko batzuetatik abiatuta eta jakinda lizitatzaileen esku dagoela eskaintza egitea, kontzesioak banatzeko prozeduran euskararen erabilerari lehentasuna emango zaio, eta euskarari derrigorrez eskatzen den gutxienekoa baino leku handiagoa eskaintzen zaionean, modu positiboan balioetsiko da eta bereziki balioetsiko da oso-osorik euskaraz jardutea.

5.- Emakidak esleitzeko prozedurak
Hauek dira, labur bada ere, irizpide orokorrak. Aipatutako helburu eta irizpide horiek lehiaketaren balorazioan nola gauzatuko diren aztertuko da jarraian.

Kontzesioak banatzeko prozedura ez da berdina izango udalentzat eta kudeatzaile pribatuentzat. Legez, udalek lehentasuna dute eta ez dute lehiaketan parte hartu behar. Dena den, oraingo honetan, bere garaian egindako erreserbari dagokion eskabidea aurkeztu beharko dute.

Iazko abenduaren 28ko Euskal Herriko Agintaritza Aldizkarian, Kultura sailburuaren 2 Agindu argitaratu ziren:

  • Tokiko telebista digitaleko kanalak udalerriei esleitzeko prozedura eta araubidea ezartzen duen Agindua, eta
  • Tokiko telebista digitaleko kanalak zeharkako kudeaketa-erregimenean esleitzeko lehiaketarako deia egiten duen Agindua.

Aginduekin batera, eranskin modura, Administrazio klausula zehatzen agiria eta Preskripzio teknikoen agiriak ere argitaratu ziren.

Lehiaketa izanik, horretarako eratu den kontratazio mahaiak neurtu beharko ditu eskaintzak. Dena den, lizitatzaileek bi GUTUN AZAL aurkeztu beharko dituzte:

- “A” GUTUN AZALA, administrazio dokumentazioa

· Dokumentazio honen bidez, lizitatzaileek Administrazioarekin jarduteko gaitasuna badutela egiaztatu behar dute, alde batetik. Bestalde, ekonomia nahiz finantza kaudimena eta kaudimen teknikoa eta profesionala ere egiaztatu beharko dute eta behin-behineko bermea eratzearen agiriak adierazi, bestak beste.

- “B” GUTUN AZALA, eskaintza teknikoa.

· Kontratazio mahaiak, 0 eta 500 punturen artean ibiliko den puntuazioa erabiliz neurtuko ditu eskaintzak. Eskaintza batek guztira jasoko duen puntuazioa, ondoren ikusiko ditugun ebaluazio-multzo bakoitzean lortutako puntuazio partzialak batuta lortuko du. Nolanahi ere, guztira lortutako gutxieneko puntuazioa 220 puntukoa izan beharko da eta gainera, ebaluazio multzo bakoitzean gutxienez eskatutakoak gainditu beharko du, horrela ezarrita dagoenean behintzat.

· Ebaluazio taldeak honako hauek dira:

1.- Bideragarritasun plana (260 puntu. Gutxienez, 130 puntu lortu beharko dira)

1.- Plan teknikoa (130 puntu. Gutxienez 65 puntu)

2.- Plan ekonomikoa (130 puntu. Gutxienez 65 puntu)

2.- Programazioa (220 puntu)

3.- Zerbitzuen datu osagarriak (20 puntu)

1.- Bideragarritasun plana ( 260 puntu, gutxienez 130 puntu)

1.1.- Plan teknikoa: (130 puntu, gutxienez 65 puntu)

a) Proiektua garatzeko plana (40):

  • Proiektuaren planaren bideragarritasuna
  • Jarduketak
  • Koherentzia
  • Partaide diren langileak
  • Horri lotutako ekipamenduak eta azpiegiturak

b) Zerbitzua zabaltzeko plana (50):

  • Zabalkunde horretan homogeneo izatea
  • Oinarri teknikoetan proposatutako helburuak hobetzea
  • Erabilgarri dauden azpiegiturak erabiltzeko konpromisoa hartzea, begi-inpaktua eta natura ingurunean egin beharreko esku-hartzea murrizteko

c) Kalitateko plana (40):

  • Zerbitzuari buruzko ebaluazio tekniko orokorra
  • Funtzionamendua
  • Zerbitzuaren fidagarritasuna
  • Zerbitzuaren kalitatea
  • Ingurumenaren iraunkortasuna

1.2.- Plan ekonomikoa (130 puntu, gutxienez 65)

- Inbertsioak eta kostuak zehazteko plana, (25):

  • Azpiegituretan inbertsioak
  • Sarea ustiatzeko kostuak
  • Edukiak ekoizteko eta kudeatzeko kostuak
  • Programak erosteko aurrekontua
  • Amortizazio plana

- Merkatuari buruzko azterketa (25):

  • Programen merkatua eta publizitate estrategiak ( lehiakortasuna, bezero potentzialak, balizko ikus-entzuleak, kultura aldetik antzerako diren merkatuetara zabaltzeko ahalmena, sindikazio-hitzarmenak)

- Finantza eta negozio plana (25). Finantza-arloko aurreikuspenak zehaztuko dira, irabazi eta galeren kontua eta kontzesioa lortu osteko hiru urteetarako aurreikusitako balantzea.

- Enplegu sortzea (25): sortuko diren lanpostu zuzenak eta zeharka sortuko direnak ere zehaztu beharko ditu.

- Euskal Autonomi Erkidegoko ikus-entzunezko sektorean egindako ekarpena (15): barrutiaren ezagutza eta Euskadiko ikus-entzunezko edukien eta ekoizpenen industria garatzeko ekarpenak egitea arlo industrial eta teknologikoan. Bestalde, sindikazioaren bitartez programak egiteko asmoa badu, honi buruzko azalpena.

- Egituraren egonkortasuna (15). Kontzesioaren aurreneko bost urteetan hasierako egiturari eustea.

2.- Programazioa (220 puntu)

2.1.- Euskarazko emisioen hobekuntza, ezarritako portzentaje minimoak gainditzeko konpromisoa eginez eta hobekuntza hori ikus-entzule gehien duten orduetan eta albistegiak, haur eta gazte programazioan egiteko konpromisoa. Euskara hutsezko emisioak hobetsiko dira. (110)

2.2.- Programazio-plana, eskatutako gutxienekoak gaindituta, norberak egindako programak, jatorrizko programak eta albistegi propioak eta tokian tokiko arazo eta gaiei buruzko programazioa ezartzeko konpromisoa. (30)

2.3.- Programazioan kultura eta hezkuntza eta arreta berezia merezi duten sektore edo taldeei zuzendutako programazioaren proposamena. (16)

2.4.- Edukien eskaintzan teknologia berrien ezarpena eta hiritarrei esku hartzeko aukera ematea eta hiritarrei aukera hori ematen zaienean (SMS, interaktibitatea..) euskaraz ere egin ahal izateko konpromisoa. Horrela balitz, zerbitzu hauek martxan jartzeko egutegia. (10)

2.5.- Emititzen ez den hizkuntza koofizialean azpitituluak ezartzeko konpromisoa eta eskuragarri dagoenean, programazioaren eskaintza bikoitza erabiltzeko konpromisoa. Zerbitzuok ezartzeko egutegia. (8)

2.6.- Interes orokorreko edukiak emateko, zonaldeko gizarte eta kultura arloko erakundeekin akordioak hartzeko konpromisoa. (8)

2.7.- Biztanleriaren dentsitate handiena duten barrutietan, nahiz eta planifikatu gabe egon, hurbilekoak diren herri edo eskualdeei begira, zerbitzua emateko programazioaren zati bat gordetzea. /Errioxa eta Enkarterriak/ (8)

2.8.- Autokontrolerako sistemak erabiltzea, telebista programetan eta publizitatean zerbitzua eskaintzeko printzipioak betetzeko. Bereziki berdintasunaren eta duintasunaren esparruetan eta Emakumeen eta gizonen Berdintasunaren Legean definitutakoak. (6)

2.9.- Zeinu-mintzaira txertatzea programa batzuetan (6)

2.10.- Euskal egile eta kantarien emanaldiak eta lanak programazioaren %15etik goragoko portzentaje batean ematea, horretarako erabiliko den ordutegia zehaztuz. (6)

2.11.- Europako obren zabalkundea egiteko emanaldiaren %51 erreserbaren betebeharra hobetzea eta egile independenteen lanen berri zabaltzeko portzentaje horren %10 erreserbatzeko betebeharra ere hobetzea. (6)

2.12.- Euskal kulturaren adierazgarri diren era guztietako bideak sustatzen erabilitako programazioari buruzko deskribapena (6)

3.- Zerbitzuen datu osagarriak (0-20)

3.1.- Martxan jarri nahi diren estrategiak (2)

3.2.- Eskainiko diren zerbitzuen ezaugarriak eta nori zuzenduak diren (2)

3.3.- Euskara erabiltzeko orduan, ezarri diren minimoak gainditzea (8)

3.4.- Zerbitzuei hasiera emateko egutegia (2)

3.5.- Zerbitzuen ordutegia (2)

3.6.- Ordaintzeko zerbitzuak direnean, tarifa eta prezioei buruzko estrategia (2)

3.7.- Aurrekoetan kontutan hartu ez diren beste arlo batzuk eta interesgarriak izan litezkeenak (2)

Udalek ere, beraien proposamena egiterakoan, goian azaldutakoari jarraituz osatu beharko dute beraien proiektua. Hortaz aparte, Udalaren Osoko Bilkurak hartutako erabakiaren egiaztagiria, zerbitzua kudeatzeko aukeratuko modua eta telebistaren kudeaketaz arduratuko direnen titulazio agiriak aurkeztuko dute.

6.- Zenbait ezaugarri

  • Lehiaketa bakarra izango da. Udalen eskabideak berezi tratatuko dira
  • Orain emititzen ari diren toki telebistek lehiaketan parte hartu eta kontzesioa lortu beharko dute emititzen jarraitu ahal izateko.
  • Emakidak 10 urteko iraupena du eta transferiezina da

7.- Epeak

- Eskaintzak aurkezteko epea: 2007ko martxoaren 23a (udalak eta partikularrak)

- “B” Gutun-azalaren irekiera publikoa (zeharkako kudeaketa): 2007ko apirilaren 26a

- Kontratazio mahaiak, esleipenaren proposamena: 2007ko ekainaren bukaeran

- Ebazpena jakin ondoren:

  • Behin betiko bermearen ekarpena egin
  • Multiplexaren gestorea
  • Instalazioen proiektu tekniko
  • Administrazio-kontratuaren sinadura

- Kontratua sinatu ondoren:

  • 18 hilabete emisioak hasteko:

§ Instalazioen ikuskaritza teknikoa

§ Hauek egiaztatu ondoren: 2 hilabete zerbitzua ematen hasteko